பெண்ணியமாம் வெங்காயம் - 2
”சாண் பிள்ளையானாலும் ஆண் பிள்ளை” அவன் ஆம்பளடி யார் கூட வேணாலும் போவான். எத்தன பொண்ணுங்க கூட வேணாலும் பழகுவான்.” போன்ற வாசகங்களை அடிக்கடி கேட்டிருப்பீர்கள். ஏன் பெண்ணுக்கு தொடர்ந்து அனைத்து உரிமைகளும் மறுக்கப்படுகிறது..? யார் இதை வகுத்தது…?? யார் இதை கடைபிடிக்கிறார்கள்..??? ஒட்டு மொத்த சமூகமும் தான். ஆம் ஆணும் பெண்ணும் அங்கம் வகிக்கும் இந்த சமூகம் தான். ”ஒருவனுக்கு ஒருத்தி” எனும் அடிப்படை கோட்பாடு கொண்ட இந்த சமூகம் [அதாவது ஆண்களும் பெண்களும் உள்ளடங்கிய சமூகம்] ஒரு பெண் வேற்று ஆணுடன் உடல் ரீதியாக பழகுவதை ஏற்றுக்கொள்வதில்லை. இது ஒரு நல்ல நெறியே. அதே போல் ஒரு ஆண் வேற்று பெண்ணிடம் உறவு வைத்துக்கொள்ளும்போதும் ஏற்றுக்கொள்ள கூடாது அல்லவா… அது தானே நியாயம். ஆனால் அப்போது மட்டும் இந்த சமூகம் “அவன் ஆம்பள எத்தன பேர வேணாலும் வைச்சிப்பான்” என ஏற்றுக்கொள்கிறது. அதாவது ஆணும் பெண்ணும் உள்ளடங்கிய இந்த சமூகம் ஏற்றுக்கொள்கிறது. ஆண் இதை ஆமோதிப்பதில் எந்த ஆச்சரியமும் இல்லை. ஏனென்றால் அவனுக்கு அதுதான் வேண்டும். அப்போதுதான் அவன் சுதந்திரமாக தவறு செய்ய முடியும். ஆனால் பெண் ஏன் இதை ஏற்றுக்கொள்கிறாள்..? ...
